BUPATI BLORA MBANTAH TUDINGAN NGLAKONI KAMPANYE SIDEM

 

INDES-POLITIK- BUPATI BLORA MBANTAH TUDINGAN NGLAKONI KAMPANYE SIDEM

BLORA, Bupati Blora, Djoko Nugroho, wis netepi panggilan saka Badan Pengawas Pemilihan (Bawaslu) babagan tuduhan nglanggar Pilkada sing ditudingno marang deweke. Kokok mbantah yen dewekne wis nyebarke tanggalan sing ana gambar garwane nalika masrahake bantuan kanggo korban lesus ing Desa Kutukan, Kecamatan Randublatung. Perlu dingerteni, garwane Bupati, Umi Kulsum saiki melu nyalon Bupati ing Pilkada 9 Desember mbesuk.

"Ya, aku mangsuli yen aku ora ngerti. Aku dituduh menehi bantuan lan kertas kuwi. Iku ora bener," ujare.

Kokok tekan kantor Bawaslu udakara jam 15:15 WIB. Dheweke teka mung dikancani ajudane. Kokok ngakoni yen sadurunge bantuan iku diwenehne, wis dibongkar sak durunge dewekne rawuh. Wektu iku akeh warga sing nyekseni.

"Jarena tanggalan. Aku kan ming menehne secara simbolis ning wong siji. Bar kuwi terus lunga. Sing liyane, sing menehno perwakilan, ana Pak Camat, ana Kapolsek," jlentrehe. 

20 Pitakon saka Bawaslu

Sawetara, Ketua Bawaslu Blora Lulus Mariyonan ujar manawa ana udakara 20 pitakon sing ajokna pihake bebarengan karo kejaksaan lan polisi kanggo Bupati Blora. Lulus ngandakake, Bupati ngakoni manawa pitulungan sosial kasebut sejatine saka pamrentah kabupaten. "Babagan tanggalan, kita takon marang Bupati, ora ana tanggalan," jarene Lulus.

Lulus kanda, sakwise proses klarifikasi rampug, pihake arep ngaji perkara iki bareng GAKKUMDU, yaiku kelompok sing kagunggung saka Bawaslu, Polres lan Kejaksaan. Miturut tata cara sing ana, penanganan prosese diwatesi limang dina. 

"Iki dina kaping pindho sawise registrasi. Iki tegese isih ana telung dina maneh," pungkase.

Saliyane ngundang Bupati, Bawaslu ing dina sing padha uga wis nimbali Kepala Kecamatan Randublatung Budiman lan Kepala Bagian Protokol lan Komunikasi, Mulyowati. (Roy-HR)