RUANG ISOLASI BLORA KEBAK MERGA KASUS COVID MUNDAK

 

INDES-SOSIAL-RUANG ISOLASI BLORA KEBAK MERGA KASUS COVID MUNDAK

BLORA, Kasus penularan virus Covid ing Kabupaten Blora sangsaya mundak. Kondisi iki nyebabake kabeh ruang isolasi kanggo penanganan pasien Covid-19 kebak. Arepo kuwi sing ana ing Rumah Sakit Umum uga ing Klinik Bhakti Padma sing dadi klinik khusus pasien Covid-19 Blora.

Trend ningkate penyebaran virus Corona Blora iki dideteksi karo Posko Gugus Tugas Percepatan Penanganan (GTPP) Covid-19 Blora. Lha ing dina Kamis (19/11/2020) diprangguli yen maune ana 931 kasus, mundak dadi 943 kasus. Ateges mundak 12 kasus.

Plt Kepala Dinas Kesehatan Blora, dr Heny Indrawati mratelaake yen pasebaran Covid-19 ing Kabupaten Blora selawase telung dina wingi ngalami peningkatan. Penanganane, 19 pasien dirawat ing rumah sakit lan 128 pasien liyane diisolasi mandiri.

"Kita ndukung saben rumah sakit nyiapno lan nambahi ruang isolasi sing sesuai standar. Tapi koyo ngene iki pancen perlu wektu," jelase Heny.

Korban ora Ketulung

Korban Covid-19 Blora kang ora ketulung tambah 2, dadi 49 wong. Wong 2 sing nemahi pati iku kabeh saka Kelurahan Ngawen Kecamatan Ngawen Kabupaten Blora.

"Wingi wong loro (2) kapundut ing Ngawen, lan wong telu dirawat. Nanging swab test'e urung metu, dadi urung iso dideteksi positif lan orane," tuture. 

Data sementara, telu saka 16 Kecamatan Blora mlebu ing status zona merah (zona risiko tinggi) persebaran Covid-19, yaiku Kecamatan Kunduran, Kecamatan Blora Kota lan Kecamatan Ngawen.

Kecamatan kanthi Status Oranye

Sawetara 11 kecamatan liyane, jlentrehe Plt Dinkes Blora, sing ana ing zona oranye (zona risiko sedang), Kecamatan Todanan, Japah, Bogorejo, Cepu, Jiken, Jepon, Tunjungan, Banjarejo, Jati, Randublatung lan Kedungtuban.

Rong kecamatan meneh, yaiku kecamatan Kradenan mlebu zona kuning (zona risiko rendah), dene kecamatan Sambong kalebu zona ijo utawa nihil kasus.

Pihake pesen supaya warga tetep matuhi protokol kesehatan, yaiku nganggo masker, ngumbah tangan nganggo sabun ing banyu mili, jaga jarak, ngendani krubungan ben padha ora ketularan Virus Corona. (Roy-HR)